ភ្នំពេញ៖សេដ្ឋកិច្ចកម្ពុជារំពឹងថា មានកំណើនក្នុងរង្វង់៥ភាគរយ ហើយអត្រាអតិផរណានឹងថយចុះទាបជាង៥ភាគរយ នៅឆមាសទី២ ឆ្នាំ២០២២នេះ។នេះបើតាមប្រសាសន៍របស់លោក ជា ចាន់តូ ទេសាភិបាលធនាគារជាតិនៃកម្ពុជា។
លោកទេសាភិបាលធនាគារជាតិនៃកម្ពុជា បានថ្លែងដូច្នេះជម្រាបទៅដល់មូលនិធិរូបិយវត្ថុអន្ដរជាតិ (IMF) ក្នុងជំនួបជាមួយលោក Alasdair Scott ប្រធានបេសកកម្មរបស់ IMF សម្រាប់កម្ពុជា នៅថ្ងៃទី៧ ខែកញ្ញា ឆ្នាំ២០២២។
លោក ជា ចាន់តូ បានជម្រាបជូនថា៖សេដ្ឋកិច្ចកម្ពុជារំពឹងថា មានកំណើនក្នុងរង្វង់៥ភាគរយ ជាមួយនឹងអត្រាអតិផរណាអាចគ្រប់គ្រងបាន ទោះបីជានៅក្នុងរយៈពេល៦ខែដើមឆ្នាំ២០២២ បានកើនឡើងក៏ដោយ ចំណែកអតិផរណានៅឆមាសទី២នេះត្រូវបានរំពឹងថា ថយចុះទាបជាង៥ភាគរយក្នុងនោះទុនបម្រុងអន្ដរជាតិកម្ពុជា បន្តរក្សាបានក្នុងកម្រិតគ្រប់គ្រាន់ស្មើនឹងប្រមាណ៧ខែនៃការនាំចូលទំនិញ និងសេវា ដែលខ្ពង់ជាងកម្រិតអប្បបរមាដែលប្រទេសកំពុងអភិវឌ្ឍន៍គួរមានគឺ៣ខែ។
លោកទេសាភិបាលបានបន្ដថា ចំពោះតម្លៃប្រាក់រៀលអត្រាប្ដូរប្រាក់រៀលធៀបនឹងដុល្លារអាមេរិកមានស្ថិរភាពល្អប្រសើរ ដោយមានកម្រិតមធ្យមប្រហាក់ប្រហែលនឹងគ្រាដូចគ្នា ក្នុងរយៈពេល៨ខែដំបូងឆ្នាំ២០២១ ក្រោមបរិការណ៍ដែលសកម្មភាពសេដ្ឋកិច្ច ងើបឡើងជាលំដាប់។ ស្ថិរភាពអត្រាប្ដូរប្រាក់បានរួមចំណែកយ៉ាងសំខាន់ ក្នុងការការពារអំណាចទិញរបស់ចំណូលប្រជាជន ក៏ដូចជាកាត់បន្ថយផលប៉ះពាល់ ពីការកើនឡើងនៃអតិផរណា៕ដោយៈសិរីមតី
